Liga po naszymu

Fajnie nasze chopy pograli w tyj kolejce. Żodyn z naszych nie przegroł, ale żodyn tyż nie wygroł. Zaczynoł w piątek Górnik w Gdańsku, w sobota Piast pojechoł do Bielska na szpil z Podbeskidziem, a zarozki po ich szpilu Ruch groł z Lechem.

Lechia - Górnik 1-1

Przed szpilem trenery chyba sie umówili na 45 minut szpilu, bo w pierwszej połowie dzioło sie sporo. Górnik pierwszy strzelił brama i nawet fajnie groł. Lechia mo jednak tako paka, że jak sie zabrali do roboty to ładowali w Kasprzika, że aż dziwne, że łon oczopląsu nie dostoł. W końcu udało im sie wyrównać, ale za chwila Górnik mioł idealno okazjo żeby ten szpil może nawet wygrać. Magiera zawsze pewnie elwry strzelo, ale terozki...ten bal ponoć kajś po Bałtyku pływo...Górnik mo co roz gorszo sytuacja w tabeli, remisami sie z dołu nie wygrzebiom.

Podbeskidzie - Piast 2-2

Ciynżko być kibicem Podbeskidzia, to je jedyny manszaft , kiery u siebie jeszcze szpilu nie wygroł. W sobota mało kto chyba liczył, że terozki sie to zmieni bo do Bielska przyjechoł Piast - lider Ekstraklasy, kiery już nie takich na wyjeździe ogrywoł. Piast groł lepij, cześciej był przy bali, ale to Podbekidzie boło bliżyj wygranyj. Dwa razy obejmowali prowadzenie, piękno brama strzelił Możdżeń, ale Piast po roz kolejny pokozoł charakter i dwa razy doprowadzoł do remisu. Dwa karne wykorzystoł Vacek, a w końcówce lider mógł nawet wygrać ten szpil. Generalnie remis zasłużony i kożdy może być rod, że tak sie skończyło

Lech - Ruch

Ruch jak ino jechoł do Poznania to były lejty takie, że czasami bram sie nie szło doliczyć. Terozki Lech je tak słaby, że liczył żech, że bydzie lepiej. Siadom w fotelu i piwa żech nie zdążył otworzyć i już Ruch wygrywoł. Za chwila ewidentny karny - Trałka chyto sie bal w swoim polu karnym ale chopy w cornym tego nie widzom chocioż stoli pora metrów od tego. Na szczyńście za chwila Stepiński drugi roz strzelił brama. Ten synek mo 20 lot a na boisku czasem sie zdaje choby groł w tej lidze już z 10 lot. Fest mi sie podobo ten grajek. Za pora lot to bydzie pewny kadrowicz, a może już za chwila? Szkoda, że Ruch nie doł rady utrzimać tego wyniku do przerwy, bo jest żech przekonany, że wtedy by ten szpil wygroł. Nie ma co się łomać, punkt na boisku mistrza to jednak dobry wynik