Liga po naszymu

Dobry, ta kolyjka nie boła dobro do naszych grajków. Ino Piast wygroł swój szpil, pozytywne jest to, że przinajmnij żodyn nie przegroł, ale po żodyn kibic niy je rod z tych remisów kiere nasze manszafty terozki zaliczyły.

Pogoń - Górnik 1-1

Górnik jechoł do Szczecina z nadzieją, ze sie udo wygrać, bo Pogoń boła fest osłabiono, ale to nic nie pmogło. Pogoń boła fest lepszo i miała kupa sytuacji co by tyn szpil wcześniej wygrać. Jak już Górnik coś stworzył to w bramie furgoł Kudła, kierego z Zabrza wyciepli bo boł za cienki. Terozki sie okazuje, że je lepszy od całyj trójki bramkarzy Górnika razym wziyntyj. Gra Górnika trocha sie rozruszała jak na szpilplac wloz Janota. Jo nie wiem czymu ten synek na ławie siedzi. Chopcy z Zabrza mieli kupa szczynścia, że zremisowali tyn szpil, ale remis nic im nie doł, bo dalyj som na ostatnim miejscu w tabeli i przez jakiś czas tak jeszcze łostanie

Wisła - Ruch 0-0

Ruch tyż zremisowoł szczynśliwie, bo Wisła miała kupa lagów, ale fajnie chytoł Putnocki, albo Krakusy szczylali kajś w luft. Fest mie wnerwioł Burliga, kiery w fusbal grać nie umi i cołki szpil kopoł Mazka. Wnerwioł mie też som Ruch, bo niby godka, że do Krakowa jadymy po wygrano, a na brama żodyn nie szczyloł. Nie popisoł sie tyż syndzia, bo mioł wyciepnąc tego Burligi, no i ewidentny karny sie Ruchowi należoł. Szkoda tyż, że kibice Ruchu ciepali racami na szpilplac, bo terozki Komisja Ligi im wdupcy tako kara, że na nastympny wyjazd pojadom za rok.

Piast - Zagłębie 2-0

Tydzień temu żech pisoł że sytuacjo wraco do normy i Piast zarozki straci lidera, albo chopy majom lekki kryzys. Terozki wiadomo : sytuacjo wraco do normy - Piast nazot wygrywo i mo sie dobrze! Latal coś tam poprzestawioł w tyj maszynie i zaś sie krynci. Od początku boło widać fto sam je liderym, a fto beniaminkiem. Bariszic sie przełamoł, klepnył dwa tory. Terozki strach sie boć jak on bydzie szczyloł, a Neszpor nie bydzie chcioł być gorszy. Co tu dożo godać : w Gliwicach Majster Jesieni. Szacun chopcy i tak trzimać!

Podbeskidzie - Jagiellonia 1-1

Podbeskidzie dalyj testuje cierpliwość swoich kibiców. Cało runda nie poradzili wygrać choby jednego szpilu u siebie. Kożdy liczył, że teroz sie udo bo Jaga mo fest kryzys. Od początku szpilu to jednak one ciśli i gdyby nie Zubas, to już do przerwy mogło być po szpilu. Dopiero pod koniec szpilu "Górale" coś tam zaczli grać, albo inaczej : wnerwił sie Mójta i sam poszoł do przodku i w drugim szpilu z rzyędu może wygrać nagroda za brama kolyjki. Za tydzień Podbeskidzie gro na wyjeździe, to może tam bydzie łatwiej o wygrano