Liga po naszymu : 18 i 19 kolejka

Co to boł za tydzień...kupa fusbalu, Barbórka i zaś kupa fusbalu. Nasze manszafty grały po dwa szpile wiync dzisioj nie byda pisoł o kozdym szpilu po kolei. Co by nikogo nie urazić, pisze według tego fto wiela punktów zdobył.

Górnik Zabrze

W ostatniyj "Lidze po naszymu" żech pisoł, że kożdy w Zabrzu już czeko na zima. Fajnie żech sie machnył. Chyba nie jo jedyn, bo fto by sie spodziewoł, że po takij marnyj grze z Łęczną nagle Górnik klupnie Piasta i to aż 5-2. Fajnie to jedyn z kolegów redakcyjnych napisoł, że nawet w Fifie Gergelem 4 bram w meczu nie idzie strzelić. Ta wygrano w derbach fest nakręciła fusbalerów, bo za pora dni wygrali na "Jadze", fto bohaterem? No jak, Gergel! W tydzień Górnik wyloz z ostatniego placu w tabeli i poleku kibice mają nadzieja, że udo sie jednak utrzimać Ekstraklasa w Zabrzu. Do tego jeszcze kupa granio i nie ma sie co podniecać, bo to ino dwa wygrane szpile, ale jest fest lepij niż boło.

Ruch Chorzów

Ruch pora dni po porażce w Gliwicach groł szpil z Koroną. Chyba dobrze, że tak gibko, bo nie boło czasu sie zastanawiać co zwalili ino cza boło zarozki tyrać po szpilplacu. No i tyrali, a szczególnie taki jedyn z Rudy Śląskiej. Wiadomo jak Korona gro na wyjazdach tym bardzij ta wygrano je cenno. Za pora dni "Niebiescy" jechali do Bielska i tam zaś pokozali charakter, ino charakter, bo fusbal na tym szpilplacu ciynżko boło pokozać, bo jo mom na ogródku lepszo murawa niż stadion w Bielsku. 4 punkty w dwóch szpilach to niezły wynik. Ruch pozinien łostać w górze tabeli na zima, bo terozki dwa szpile, w kierych 4 punkty to minimum.

Piast Gliwice

Szli przez liga jak taran. Do Zabrza jechali po roz piyrszy jako faworyt derbów i to ich chyba przerosło. Piast nie groł tego co zawsze. Wcześniyj grali poleku, czekali na swoja szansa, a w derbach ciepli sie na Górnik choby go rozszarpać mieli i sie nadzioli na kontry. Takie klepy sie Piastowi przidały, co by sie fusbalerom nie zdowało, że terozki inni bydom legać przed nimi. Za pora dni grali z Cracovią i to już boł Piast jaki znomy, efektowny i inteligentny fusbal. Szybko sie pozbierali i cało zima bydom siedzieć na fotelu lidera. No chyba, że terozki dwa razy przegrajom, ale jo w to nie wierza. 13 grudnia byda im mocno kibicować.

Podbeskidzie Bielsko-Biała

Niby Podbeskidzie ino 1 punkt zdoboło, ale mieli ciynżkie szpile. 2 grudnia jechali na Cracovia, kaj wiadomo, że je ciynżko. 4-1 to srogi wynik, ale fto wie jak by sie skończyło, gdyby torman nie chycił przy 2-1 tej kepy Szczepaniaka. Ogólnie "Górale" nie zasłuzyli sie aż na takie lejty. Pora dni potym do Bielska przyjechoł Ruch, a wiadomo, że jak szpil u siebie to Podbeskidzie nie wygrywo. Terozki zaś tak boło, ale tego szpilu nie ma sie co wstydzić. Nastympno kolejka tyż bydzie ciynżko, ale na wyjeździe fusbalery Podolińskiego zawsze mogom coś zdobyć.