Liga po naszymu : 16 kolejka

Po przerwie na kadra zawsze je lekko niepewność jak to bydzie w nastympnym szpilu. Podbeskidzie i Górnik w przerwie zagrali sparing, a Ruch i Piast sie spokojnie trenowali, fto na tym lepij wyloz?

Termalica - Piast 3-5

Zaroz, zaroz 3-5? W co one grali? Przeca terozki nawet w hokeju takich wyników ni ma. To był fest radosny szpil i bram mogło być jeszcze pora. Padło 8 bram, a żodyn nie godo, że kieryś torman zagroł słabo. Co wiencyj Szmatuła przez niekierych zostoł wybrany graczem szpilu. Takie szpile szło by oglondać co kolyjka, to może boł nojlepszy szpil weekendu, a boło co oglondać, nie ino w Polsce. Od kiedy pisza te podsumowania to nie mioł żech za co skryklać Piasta, to ino pokazuje jak chopy grajom. Już kożdy kibic sie przyzwyczaił, że w Gliwicach je lider i to nie z przipadku, co wiencyj tego lidera jeszcze długo bydom mieć

Górnik - Wisła 1-1

Ten szpil sie zaczył zarozki po szpilu Piasta...oj ciynżko było usiedzieć i to oglondać. Górnik gibko stracioł brama i mioł szczynście, że za chwila nie boło 0-2. W drugij połowie udało sie wyrównać i w Zabrzu powinni być rod, że tyn szpil zremisowali, przeca grali z drużyną kiero mo 13 punktów wincyj. Tak jak Piast jeszcze długo bydzie mioł lidera, tak Górnik długo ostanie w strafie spadkowyj. 4 drużyny kiere som w tabeli nad Górnikiem majom trocha lepszych grajków. Oj zima bydzie gorąco w Zabrzu...ale kaj tam do zimy, trzeba zagrać jeszcze pora szpilów, a nie widza w tyj ekipie nadzieji na lepsze granie za tydzien, za dwa, ani nawet za miesiąc...

Łęczna - Ruch 0-3

Ruch groł o tyj samyj porze co Real - Barcelona i tak jak Barca mo swoje trio, tak już idzie godać, że Ruch mo swoje. W drugim z rzyndu szpilu gole szczylajom te same chopy. W Barcelonie to som 3 napastniki, a w Ruchu obrońca, pomocnik, i napastnik. To pokazuje, że Ruch je groźny w kożdyj chwili, w kożdym elemencie gry. Ruch wygroł 3-0, ale to nie boło tak, ze sie na luzie klepali te tory. Chopy fest tyrali, co by tyn wynik uzyskać. "Niebiescy" majom fest pecha do kontuzji, ale nikt nie narzeko ino robi swoje i za to wielki szacun. Za tydzień Ruch gro z Piastem, zapowiado sie feeeest szpil.

Podbeskidzie - Zagłębie 1-2

Kolejny szpil u siebie i zaś porażka, jo nie wiem jak idzie przez tyla szpili nie wygrać na swoim stadionie. Terozki miało być inaczyj, bo do Bielska przyjechało Zagłębie, kiere od 6 szpili nie wygrało nikaj. W 41 minucia brama szczylo Demjan i kożdy sie pomyśloł "Ja, teroz wygromy", a tu rzić jeszcze przed przerwą Zagłębie wyrównało, a drugo połowa to już boł Bielski standard...Po zmianie trenera Podbeskidzie gro fest lepi, ale jak chce awansować do grupy mistrzowskiej, to trzeba pora szpili u siebie wygrać