Liga po naszymu : 15 kolejka

Do 15:31 to boła fest dobro kolyjka w wykonaniu naszych manszaftów. Czemu akurat do 15:31, bo wtedy Górnik stracioł brama i wiadomo był, że nie bydzie kompletu wygranych Ślonskich klubów. Podbeskidzie grało w Mielcu z Termalicą, Ruch u siebie z Lechią, Piast groł Na Jagiellonii, a Górnik u siebie z Koroną.

Termalica - Podbeskidzie 0-2

Podbeskidzie zaś pokozało, że woli grać na wyjazdach, to boł 9 szpil na wyjeździe, a ino roz przegrali. Dobry torman i gibkie kontry to cołki przepis na szpil. Proste, ale działo, a jak działo to po co to zmieniać. Zaś dobry szpil zagroł Możdżeń, kiery najpierw som szczelił brama, a potym podowoł do Demjana. Synek wraco do formy i coś czuja, że Podbeskidzie bydzie miało z niego kupa radochy.

Ruch - Lechia 3-2

Na tym szpilu szło zlyź na herzklekoty... Fajnie Ruch zaczył, 3 szybkie klepy i Lechia leży i kwicy. W drugij połówce cza boło ino ich dobić, sprzedać jeszcze jedna klepa i by boło po szpilu. Wejrzyjcie sie co żech pisoł pora tydni temu : pisoł żech, że za chwila Stępiński może trefić do kadry i sie sprawdziło, oby terozki Nawałka doł mu szansa, bo z synka naprowdy może być kawał grajka. Byle ino działacze za chwila go kajś nie sprzedali za marne piniondze. Jeszcze taki apel do działaczy w innyj sprawie : wyślijcie Kuświkowi rachunek za te drzwi.

Jagiellonia - Piast 0-2

Skończyła sie godka, że Piast gro ino o awans do grupy mistrzowskiej, terozki cza głośno pedzieć : Piast gro o majstra. Momy połowa ligi a chopcy majom lidera, majom 8 punktów przewagi nad Legią, to o co majom grać jak nie o majstra. Już nie byda po roz kolejny pisać jak to Piast fajnie zagroł, bo to już kożdy wie, terozki ino cza przypomnieć działaczom, że już terozki trzeba zadbać o kadra na przyszły sezon

Górnik - Korona 0-1

Korona bez cało runda nie straciła bramy na wyjeździe z gry i wiadomo boło,m że to bydzie ciynżki szpil do Górnika. Wcale taki ciynżki nie ból, bo Górnik mioł kupa lagów w tym szpilu, ale zamiast szczylać tory to fusbalery woleli zrobić z tormana Korony bohatera, bo inaczyj nie idzie wyjaśnić czymu z 3m szczylajom prosto w niego. Jak do Zabrza w zima nie przidzie 2-3 młodych synków kierym sie bydzie chciało lotać do nie ma do Górnika ratunku.