Pyjter godo: Co za gupio liga!

Co to je ze gupio liga... takiego bajzlu to nikaj żech jeszcze nie widzioł, nawet u mojyj w szafie...Nikaj na świecie nikt nikomu punktów niy zabiero w trakcie sezonu, nikaj nie widzioł żech, żeby klub po ostatniyj kolyjce nie wiedzioł na kierym je placu. Do mie piyrszy akandal to boło zabieraniu punktów Ruchowi i Lechii w trakcie granio. Te z Gdańska sie wycwanili i kombinowali co by tyn punkt dostać nazot, Ruch cicho siedzioł, bo prezesa żodyn w PZPN nie lubi i sie boli co by im jeszcze pora punktów niy zabrali. Przyłazi dzień do ostatni kolyjki tego "sezonu zasadniczego" i nagle ftoś z jakiegoś trybunału pado "oddajemy Lechii punkt". W PZPN nic niy wiedzom, w Ekstraklasie nic niy wiedzom. To jo sie pytom fto mo wiedzieć? Jo?

Dobra grajom ta ostatnio kolyjka i nagle Ruch i Podbeskidzie majom identyczno sytuacjo i mo decydować "tabela Fair Play". Ino jak jo sie poczytoł co tam decyduje o miejscu w tabeli to żech sie za gowa chycił..."pozytywna gra" - co to mo być? Jak chopcy lotajom to się majom usmiechać do kamer? Po starconyj bramie gratulować rywalowi? "Zachowanie kibiców" - jak to sie mo do piłkorzy? To może jo terozki zaczna na szpile do goroli jeździć i byda haje robić u nich na trybunach to Ślunskie kluby bydom lepij w tyj tabeli "Fair play" stoć? Z tego co mie sie kojarzy to w tabeli fair play powinny być żółte, czerwone kartki no i może popełnione faule i nic wiyncy. Ino że jakby tak boło to by sie gorzyj układało tabela...Teroz nagle Lechia wycofuje skarga i tabela zas sie zmiynio. Wcześniy płakoł Ruch, terazki becy Podbeskidzie, to może Lechia wyciepcie za sionie fermentów? A niy...jo zapomnioł, że one bogate som...

Bestoż jo proponuja zrobić nowo reforma : 1.Legia mo majstra od razu bez granio,  bo jak to godajom "eksperty" "Tylko Legia miałaby szanse w eliminacjach Ligi Mistrzów". To jak som takie dobre to czamu przez tyla lot nie awansowali, albo czamu jak im niy idzie to zarozki syndzia wymyślo jakiś elwer? Legia cołki sezon gro 30 sparingów, ale ino u siebie i kożdy szpil mo być w tv. 2. Lech, Lechia i jedyn losowo wybrany klub grajom o place 2-4, przeca ino bogate mogom nos "reprezentować w Europie". Tyn jedyn losowy, bo ftoś tam jeszcze musi grać w tyj Lidze Europy. 3. Cało reszta gro o utrzymanie, ale spadkowicza i tak sie ftoś z jakiegoś trybunału czy inkszyj komisji ligi som wybiere - zależy jak tam sie tabela poukłado.

Tak na poważnie to wyciepcie ta choro reforma z dziylyniem punktów, z dziylyniem tabeli, jak mo być lepszo liga, to musi być wiyncyj zespołów. 18 bołoby w sam roz. I niy kombinujcie już z zabiyraniem punktów czy inkszymi "tabelami Fair Play", niech o tabeli decyduje INO FUSBAL!

Pyjter!