Liga po naszymu : 17 kolejka

Dzioło sie sporo, kożdy czekoł na szpil lidera z czwortym przed tą kolyjkom Ruchem. Górnik i Podbeskidzie chciały wreszcie wygrać szpil u siebie, co im sie downo nie udało.

Piast - Ruch 3-0

To mioł być prawdziwy test do Piasta, bo Ruch już w tym sezonie wygroł z Piastem, a ostatnio za kożdym razem jak "Niebiescy" jechali do Gliwic, to za kożdym razem wracali z punktami. Terozki jednak manszaft z Gliwic je mocny jak nigdy i pokozoł to w piątek. Już do przerwy lider klupnył dwa tory i boło po szpilu. Ruch som zawalił te bramy, bo takie babole się zdarzyć nie powinny. Po przerwie Ruch przycis i mioł kilka okazji i na pewno nie zasłużył co by przegrać 0-3. Piast zaś pokozoł jak sie inteligentnie gro i wygrywo. Nie moga nie wspomnieć o kibicach. O ile na szpilplacu Piast wygroł 3-0, to na trybunach 3-0 wygroł Ruch! Na zakazie wyjazdowym do Gliwic pojechało 3300 chopa z Chorzowa! Takiego larma tyn stadion downo nie słyszoł i chyba jeszcze długo nie usłyszy, no chyba, że zaś tam pojedzie Ruch.

Górnik Zabrze - Górnik Łęczna 1-1

W ostatnich szpilach u siebie Górnik już zaroz na początku tracioł bramy. Terozki boło inaczyj ino wynik zaś do rzici. Górnik groł bez swojego jedynego, jaki by on nie był napadziora i boł problem. W ataku zagroł Skrzypczak i on akurat swoje zrobioł. Pod koniec szpilu trefioł do bramy i już kożdy na trybunie prasowyj pisoł, że Górnik wreszcie wygroł szpil. Trocha za wczas, bo w ostatnij akcji szpilu Łęczna wyrównała i zaś Górnik dopisuje sie ino 1 punkt, a bezpieczno strefa sie oddalo...Kożdy w Zabrzu już chyba czeko na 2016r, a do rozegranio jeszcze 4 szpile.

Podbeskidzie - Legia 2-2

Podbeskidzie zaś nie wygrało u siebie, ale terozki nikt nie mo do fusbalerów pretensji. po takim szpilu nic ino wstać i klaskać! 6 minuta i Demjan na 1-0. Legia cisła, ale Bielsko sie dobrze broniło. Chwila przed przerwą czerwono kartka obejrzoł Kolczak i kożdy godoł, że terozki to już na bank Legie coś wciśnie. Wcisła na 1-1, ale podbeskidzie pokozało "Górolski charakter" i na 4 minuty przed końcem trefiło na 2-1. Warszawioki ciepli sie do przodu i w ostatnj akcji szpilu im sie udało...szkoda bo Podbeskidzie pokozało fest charakter i zasłużyli sie na wygrano.